Служба в праздник Преображения Господня

in Праздники category

На малей вечерни,
поем стихиры на 4, глас 1:
Подобен: Небесных чинов:
Иже с Моисеом Глаголавый древле на горе Синайстей образы, глаголя, Аз есмь Бог Сый: днесь же на горе Фаворстей преображься, началообразное показа лучами облистаяся. Темже, Христе, величаю Твою силу. [Дважды]
Поим особь Твоя, Христе, ученики, Петра, Иакова, и Иоанна, волею на гору сих возвел еси, чудо страшное показав и нестерпимое, Божественнаго пришествия Твоего издалеча присносущное благолепие.
Твоего, Христе, пришествия непостижимаго, трепетни бывше апостоли древле, ниц на землю падше: Божественней Твоей дивляхуся силе: солнца просияв светлее, Блаже, неизреченною силою Твоею.
Слава, и ныне, глас 8.
Мрак законный, светлый Преображения прият облак, в немже Моисей и Илиа бывше, и Пресветлыя славы сподобльшеся, Богу глаголаху: Ты еси Бог наш, царь веков.
На стиховне стихиры, глас 2.
Подобен: Доме Евфрафов:
Днесь Христос на горе фаворстей Адамово пременив очерневшее естество, просветив богосодела.
Стих: Твоя суть небеса, и Твоя есть земля.
Сиянием добродетелей, просвещшеся вопием, на горе святей зряще Божественное Господне Преображение.
Стих: Фавор и Ермон о Имени Твоем возрадуетася.
Солнце убо землю уясняя, абие заходит: Христос же со славою облистав на горе, мiр просветил есть.
Слава, и ныне, глас 8, подобен тойже:
Видеша на Фаворе, Моисей же и Илиа, от Девы Отроковицы Бога воплощаема, человеком на избавление.
Тропарь, глас 7:
Преобразился еси на горе Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы, Светодавче слава Тебе.

На велицей вечерни.
Стихология не бывает, токмо аще есть неделя, тогда поем кафисму всю; аще в понедельник, первый антифон.
На Господи, воззвах, стихиры на 8, самогласны, глас 4, по дважды. Космы монаха.
Прежде Креста Твоего, Господи, гора Небеси подобяшеся, и облак, яко сень, протязашеся, Тебе преобразующуся, от Отца же свидетельствуему: тамо бе Петр со Иаковом и Иоанном, яко хотяху быти с Тобою и во время предания Твоего, да видевше чудеса Твоя, не устрашатся страданий Твоих, имже поклонитися нам в мире сподоби, великия ради Твоея милости.
Прежде Креста Твоего, Господи, поим ученики на гору высоку, преобразился еси пред ними, лучею силы озаряя их, отсюду убо человеколюбием, отнуду властию, показати хотя Воскресения светлость, егоже и нас, Боже, в мире сподоби, яко Милостив и Человеколюбец.
Гора, яже иногда мрачна и дымна, ныне же честна и свята есть, на нейже нозе Твои стоясте, Господи, превечное бо сокровенное таинство напоследок явлено сотвори, страшное Твое Преображение, Петру, и Иоанну, и Иакову. Иже, такова сияния лица Твоего не терпяще, и светлости риз Твоих, ниц на лице земли покрывахуся, иже и ужасом одержими, дивляхуся, видяще Моисея и Илию, глаголюща с Тобою, хотящая приключитися Тебе: и глас от Отца свидетельствоваше, глаголя: Сей есть Сын Мой возлюбленный, о Немже благоизволих, Того послушайте, Иже и дарует мiрови велию милость.
На горе высоце преображся Спас, верховныя имея ученики, преславно облистал есть, показуя, яко высотою добродетелей облиставше и Божественней славе сподобятся. Глаголющии со Христом Моисей и Илия показоваху, яко живыми и мертвыми обладает и Иже древле законом и пророки глаголавый есть Бог, Емуже и глас Отечь из облака светла послушествоваше, глаголющий: Того послушайте, Иже Крестом ада пленивша и мертвым дарующа живот вечный.
Слава, и ныне, глас 6. Анатолия.
Прообразуя Воскресение Твое, Христе Боже, тогда поят три Твоя ученики, Петра и Иакова и Иоанна, на Фавор возшел еси. Тебе же, Спасе, преобразующуся, Фаворская гора светом покрывашеся, ученицы Твои, Слове, повергоша себе долу на земли, не терпяще зрети невидимаго зрака, Ангели служаху страхом и трепетом, небеса убояшася, земля вострепета, видяще на земли славы Господа.
Вход. Прокимен дне. И чтения три.
Исхода чтение. [Глава 24.]
Рече Господь к Моисею: взыди ко Мне на гору, и стани тамо, и дам ти скрижали каменныя, закон и заповеди, яже написах взаконити им. И востав Моисей и Иисус предстояй ему взыдоша на гору Божию. И старцем рече: безмолвствуйте тамо, дондеже возвратимся к вам. И се Аарон и Ор с вами: аще кому прилучится суд, да идут к ним. И взыде Моисей на гору, и покры облак гору. И сниде слава Божия на гору Синайскую, и покры ю облак шесть дней, и призва Господь Моисеа в день седмый, из среды облака. Видение же Славы Господни, яко огнь паля на версе горы, прямо сынов Израилевых. И вниде Моисей посреде облака, и взыде на гору, и бе тамо на горе четыредесять дней, и четыредесять нощей.
Исхода чтение: [Главы 33 и 34.]
Во днех онех, глагола Господь к Моисею лицем к лицу, яко аще бы кто возлаголал к своему другу, и отсылашеся в полк: слуга же Иисус сын Навин юноша не исхождаше из скинии. И рече Моисей ко Господу: се Ты мне глаголеши, изведи люди сия, Ты же не явил ми еси, егоже послеши со мною: Ты же мне рекл еси, вем тя паче всех, и благодать имаши у Мене. Аще убо обретох благодать пред Тобою, яви ми Самаго Тебе разумно, да вижу Тя: яко да обрет буду благодать пред Тобою, и да разумеют, яко людие Твои язык сей. И глагола ему Господь: Аз Сам предыду пред тобою, и упокою тя. И рече к нему Моисей: аще Сам Ты не шествуеши с нами, да не изведеши мя отсюду. И како ведомо будет воистинну, яко обретох благодать у Тебе, аз же и людие Твои, точию идущу Ти с нами? И прославлен буду аз же и людие Твои паче всех язык, елицы суть на земли. Рече же Господь к Моисею: сие слово твое, еже рекл еси, сотворю: обрел бо еси благодать предо Мною, и вем тя паче всех. И глагола Моисей: покажи ми славу Твою. И рече: Аз предыду пред тобою славою Моею, и воззову о Имени Моем, Господь пред тобою. И помилую, егоже аще милую: и ущедрю, егоже аще щедрю. И рече: не возможеши видети лице Мое, не бо узрит человек лице мое, и жив будет. И рече Господь: се место у Мене, и станеши на камени. Дондеже убо прейдет слава Моя, и положу тя в разселине камене, и покрыю рукою Моею над тобою, дондеже мимоиду. И отиму руку Мою, и тогда узриши задняя Моя, лице же Мое не явит ти ся. И утреневав Моисей, заутра взыде на гору Синайскую, якоже глагола ему Господь. И сниде Господь во облаце, и предста ему тамо Моисей, и призва Именем Господним. И мимоиде Господь пред лицем его, и призва: Господь Бог Щедр, и Милостив, Долготерпелив, и Многомилостив, и Истинен: и потщався Моисей приник на землю, поклонися Господеви.
Царств третиих чтение. [Глава 19.]
Во днех онех, прииде Илиа в Вирсавию, яже есть земля Иудова, и остави отрочища своего тамо. И сам пойде в пустыню путь дне, и прииде, и седе под смерчием и успе, и сон виде тамо под садом. И се некий прикоснуся ему, и рече ему: востани, яждь и пий. И воззре Илиа, и се при возглавии его опреснок ячменный, и корчаг воды, и воста, и яде и пит, и обращься успе. И обращвся ангел Господень вторицею, и коснуся его, и рече ему: востани, яждь и пий, яко мног от тебе путь. И воста и яде и пит: и иде к крепости яди тоя четыредесять дней и четыредесять нощей, до горы Хоривския. И вниде тамо в пещеру, и вселися в ней. И се глагол Господень к нему и рече ему Господь: изыди и стани на горе пред Господем. И се Господь мимоидет, и дух велий и крепок, разоряя горы, и сокрушая камение пред Господем: не в дусе Господь. И по дусе трус: и не в трусе Господь. И по трусе огнь: и не во огни Господь. И по огни глас хлада тонка, и тамо Господь. И бысть яко услыша Илиа, покры лице свое милотию своею, и изыде, и ста близ пещеры. И рече Господь к нему: иди и возвратися в путь твой. И пойдеши в путь пустыни Дамасковы, и помажеши Елиссеа сына Асафатова вместо тебе пророка.
На литии стихиры самогласны, глас 2:
Иже светом Твоим всю вселенную освятив, на горе высоце преобразился еси Блаже, показав учеником Твоим силу Твою, яко мiр избавляеши от преступления. Темже вопием Ти: Милосерде Господи, спаси души наша.
Иже на горе Фаворстей преображься во славе Христе Боже, и показав учеником Твоим славу Твоего Божества, озари и нас светом Твоего разумения, и настави на стезю заповедей Твоих, яко Един Благ и Человеколюбец.
Иже прежде солнца Свет Христос, телесне на земли жительствуя, и прежде Креста вся яже страшнаго смотрения, совершив боголепно, днесь на Фаворстей горе, тайно Троицы образ показуя: изящныя бо три ученики, Петра и Иакова и Иоанна, на ню возвел еси наедине, и мало скрыв плоти восприятие, преобразился еси пред ними, являя началообразныя доброты благолепие, и то не всесовершенно: ово извествуя тыя, вкупе и щадя, да не како со зраком и еже жити погубят, но яко можаху вмещати, телесныма очима стерпяще. и пророков верховныя Моисеа и Илию привел еси, непрекословне свидетельствующия его Божество: и яко Той есть истинное Отеческаго Существа Сияние, господствуяй живыми и мертвыми. Тем и облак якоже сень объят их, и глас свыше Отечь из облака шумно предсвидетельствующь и глаголющь: Сей есть, Егоже нетленно прежде денницы из чрева родих, Сын Возлюбленный Мой: Егоже послах спасти во Отца и Сына и Духа Святаго крещаемыя, и исповедающия верно, яко нераздельна есть едина Держава Божества, Того послушайте. Сам убо Человеколюбче Христе Боже, и нас озари светом неприступныя Твоея славы, и достойны покажи наследники Царствия Твоего, яко Преблаг.
Слава, глас 5:
Приидите взыдем на гору Господню, и в дом Бога нашего и узрим славу Преображения Его, славу яко Единороднаго от Отца: светом приимем Свет, и возвышени бывше Духом, Троицу Единосущную воспоим во веки.
И ныне, глас тойже:
Закона и пророков Тя Христе, Творца и Исполнителя свидетельствоваша, зряще во облаце, Моисей боговидец, и Илиа огнеколесничник, и неопальный небошественник, в Преображении Твоем: с нимиже и нас Твоего просвещения сподоби Владыко, пети Тя во веки.
На стиховне стихиры самогласны, глас 1.
Иже древле с Моисеом глаголавый на горе Синайстей образы, Аз есмь, глаголя, Сый, днесь на горе Фаворстей преображся пред ученики, показа началообразую доброту зрака, в Себе восприим человеческое существо, и таковыя благодати свидетели поставль, Моисея и Илию, общники творяше веселия, провозвещающия славное Креста ради и спасительное Воскресение.
Стих: Твоя суть небеса и Твоя есть земля.
Твоего Единороднаго Сына провидев Духом, плотское к человеком пришествие, богоотец Давид издалеча к веселию созывает тварь и пророчески взывает: Фавор и Ермон о Имени Твоем возрадуются. На сию бо взошел гору, Спасе, со ученики Твоими, очерневшее Адамово естество, преображься, облистати паки сотворил еси, претворив е в Твоего Божества славу же и светлость, Темже вопием Ти: Содетелю всяческих, Господи, слава Тебе.
Стих: Фавор и Ермон о Имени Твоем возрадуетася.
Неодержимое Твоего светолития, и неприступное Божества, зряще Апостолов лучшии, на горе Преображения, Безначальне Христе, Божественным изменишася ужасом и облаком осиявшеся светлым, глас слышаху Отеч, извествующ таинство Твоего вочеловечения, яко Един еси и по воплощении, Сын Единородный и Спас мiра.
Слава, и ныне, глас 6.
Петру и Иакову и Иоанну, лучшим учеником Твоим, Господи, днесь показал еси на горе Фаворстей славу Божественнаго Твоего зрака: видяху бо ризы Твоя, облиставшия яко свет, и лице Твое паче солнца, не терпяще зрети нестерпимое Твоего сияния, на землю ниспадаху, никакоже зрети могуще. Глас же слышаху, свидетельствующ свыше: Сей есть Сын Мой возлюбленный, пришедый в мiр спасти человека.
На благословении хлебов, тропарь, глас 7:
Преобразился еси на горе, Христе Боже, показавый учеником Твоим славу Твою, якоже можаху, да возсияет и нам, грешным, свет Твой присносущный молитвами Богородицы, Светодавче, слава Тебе.

На утрени,
на Бог Господь, тропарь праздника, трижды.
По 1-м стихословии седален, глас 4:
Подобен: Удивися Иосиф:
Человеческое изменение, еже со славою Твоею, Спасе, второе и страшное Твоего Пришествия показуяй, на горе Фаворстей преобразился еси, Илиа и Моисей глаголаху с Тобою, и триех от ученик спризвав: иже видевше, Владыко, славу Твою, блистанию Твоему удивишася. Иже тогда сим свет Твой Возсиявый, просвети души наша.
Слава, и ныне, тойже:
По 2-м стихословии, седален, глас 8 подобен тойже:
На горе Фаворстей преобразился еси, Иисусе, и облак светел протязающься яко сень, апостолы славою покры: темже и на землю ниц падаху, не терпяще зрети светлости неприступныя Славы лица Твоего, Безначальне Спасе Христе Боже. Иже тогда сим свет Твой Возсиявый, просвети души наша.
Слава, и ныне, тойже.
По полиелеи седален, глас тойже.
Подобен: Вознесыйся:
Возшед со ученики на гору, и во славе Отчи облистав, с Моисеом Илиа Тебе предстоят, закон и пророцы бо яко Богу служат. Емуже и сыновство естественное Родитель исповедая, нарицаше Сына: Егоже воспеваем с Тобою и Духом.
Слава, и ныне, глас 8.
Подобен: Повеленное:
Сокровенную молнию под плотию существа Твоего, Христе, и Божественнаго благолепия, на святей показал еси горе Благодетелю, просияв сущим с Тобою учеником. и разумевше нестерпиму сущу славу Твою, Свят еси, возопиша: яко неприступен Сый, виден был еси плотию мiрови, Едине Человеколюбче.
Степенна, 1-й антифон 4-го гласа.
Прокимен, глас 4:
Фавор и Ермон о Имени Твоем возрадуетася.
Стих: Твоя суть небеса, и Твоя есть земля.
Евангелие Луки, зачало 45.
По 50-м псалме: Слава:

Всяческая днесь радости исполнишася, Христос преобразися пред ученики.
И ныне, тойже.
Стихира самогласна, глас 5:
Божества Твоего Спасе, малу зарю обнажив, совозшедшим с Тобою на гору, премiрныя Твоея славы сотворил еси рачители. Темже ужасно зовяху: добро есть нам зде быти. с нимиже и мы Тебе Преображшагося Спаса Христа поем во веки.
Канона два, кир Космы, глас 4: и кир Иоанна, глас 8. Ирмосы обою канонов по дважды: тропари вси поем на 12.
Канон, глас 4.
Песнь 1.
Ирмос:
Лицы Израильтестии, невлажными стопами понт Чермный и влажную глубину програвше, всадники тристаты видяще в ней погружены, с веселием пояху: поим Богу нашему, яко прославися.
Глаголы животныя другом Христос и о Божественнем наказуя Царствии, рече: во Мне Отца познайте, Светом яко облистая неприступным, в радости поюще: поим Богу нашему, яко прославися.
Силою язык облечетеся, друзи ученицы, чудни же будете в богатстве их, яко славы наполнитеся, яко явлюся светлее солнца, облистая в радости поющих: поим Богу нашему, яко прославися.
Днесь Христос, на горе Фаворстей просияв ясно Божественною зарею, якоже обещася, учеником обнажи зрак, светоносныя же наполнившеся Божественыя зари, в радости пояху: поим Богу нашему, яко прославися.
Другий канон, глас 8.
Песнь 1.
Ирмос: Воду прошед, яко сушу, и египетскаго зла избежав, израильтянин вопияше, Избавителю и Богу нашему поим.
Моисей, на мори пророчески видев облаком и столпом древле огненным славу Господню, вопияше: Избавителю и Богу нашему поим.
Яко каменем, телом покрывся, обожением невидимаго зря, Моисей Боговидец взываше: Избавителю и Богу нашему поим.
Ты на горе законней и на Фаворстей виден был еси Моисеем во мраце древле, во свете же ныне неприступнем Божества.
Катавасия: Крест начертав:
Песнь 3.
Ирмос: Лук сильных изнеможе, и немощствующие препоясашася силою, сего ради утвердися в Господе сердце мое.
Во всего Адама облекся, Христе, очерневшее изменив, просветил еси древле естество иизменением зрака Твоего богосоделал еси.
Столпом огнезрачным и облаком древле Иже в пустыни Израиля ведый, днесь на горе Фаворстей неизреченно во свете Христос просия.
Ин.
Ирмос:
Небеснаго круга Верхотворче, Господи, и Церкве Зиждителю, Ты мене утверди в любви Твоей, Желаний Краю, верных утверждение, Едине Человеколюбче.
Осеняющая слава в сени первее и Моисееви беседующи, Твоему угоднику, образ бысть облиставшаго неизреченно на Фаворе, Владыко, Твоего Преображения.
Совзыдоша Ти, Слове Единородный, вышнии апостольстии верси на гору Фаворскую, и сопресташа Ти Моисей же и Илия, яко Божия слуги, Едине Человеколюбче.
Бог Слово сый, весь землен бысть, всему Божеству смесив человечество во Ипостаси Своей, юже во двою существу Моисей и Илия же видеша на горе Фаворе.
Седален, глас 4.
Подобен: Удивися Иосиф:
На горе Фаворстей преобразился еси, Иисусе, посреде Илии и Моисея премудрых, со Иаковом и Петром и Иоанном. Петр же, сопребывая, сия Тебе глаголаше: добро зде есть сотворити три сени: едину Моисею, и едину Илии, и едину Тебе, Владыце Христу. Иже тогда Свет Твой сим возсиявый, просвети души наша.
Слава, и ныне, тойже.
Песнь 4.
Ирмос: Услышах славное смотрение Твое, Христе Боже, яко родился еси от Девы, да от лести избавиши зовущия: слава силе Твоей Господи.
Закон в Синаи писанием воображая, Христе Боже, во облаце, и огни и мраце, и в вихре явился еси носим: слава силе Твоей, Господи.
Да увериши славное строение Твое, Христе Боже, яко Сый прежде век и Тойже на облаце восхождение положивый, на Фаворе неизреченно просиял еси.
Соглаголюще, предстояху раболепно Тебе, Владыце Христу, к нимже парою огня и мрака и тонким хладом беседовал еси: слава силе Твоей, Господи.
Возвещаху славное Креста ради Твоего, на Фавр пришедше, иже во огни Тя и купине древле превидевый Моисей и взятый на колеснице огненней Илия, Христе.
Ин.
Ирмос:
Из плоти Твоея лучи Божества исходяху пророком и апостолом. Тем начальницы, поюще, взываху: слава силе Твоей, Господи.
Иже купину сохранивый неврежденну, прикоснувшуюся огню, Моисею богосиянную плоть показал еси, Владыко, поющему: слава силе Твоей, Господи.
Скрыся зарею Божества чувственное солнце, яко на горе Фаворе видев Тя преобразующася, Ииусе мой: слава силе Твоей, Господи.
Огнь, не опаляя вещи телесныя, виден бысть невещественен, якоже Моисею и апостолом явился еси, Илии же, Владыко, един от двою, во дву совершенну естеству.
Песнь 5.
Ирмос: От света пресекий первородный свет, яко во свете дела поют Тя, Христе, Содетеля, во свете Твоем пути наша направи.
Пред лицем Твоим горы уклонишася, свет бо и пред ногами неботечныя лучи, Христе, солнца прииде, зрак землен яко прияти благоволил еси.
Се Спас, вопияху Моисей и Илия учеником, на горе святей Фаворстей оглашаемым, Христос, егоже древле провозвестихом Сущаго Бога.
Неизменное естество, человеческому примешся, обильно Невещественнаго Божества Свет, изобнажив апостолом, неизреченно возсия.
Тя, Присносущное Сияние, во Отечестей славе ученицы яко видевше возсиявша, Христе, Тебе вопияху: во свете Твоем пути наша направи.
Ин.
Ирмос
: Вскую мя отринул еси от лица Твоего, Свете незаходимый, и покрыла мя есть чуждая тьма окаяннаго? Но обрати мя и к свету заповедей Твоих пути моя направи, молюся.
Ветийствующий язык Твоего величества не может вещати: яко бо, Держай живот и смертию Владый, представил еси на Фаворстей горе Моисея и Илию, свидетельствующия Твое Божество.
Иже руками невидимыми создав по образу Твоему, Христе, человека, началообразную Твою в создании доброту показал еси, не яко во образе, но яко Сам Сый по существу, Бог был еси и Человек.
Срастворився неслиянно, угль горящ показал еси нам Божества, попаляющ убо грехи, души же просвещающ, на Фаворстей горе, Моисея со Илиею, учеников же старейшия удивил еси.
Песнь 6.
Ирмос:
Внегда скорбети ми, возопих ко Господу, и услыша мя Бог спасения моего.
Сияния паче солнца Свет яснейший, Спас, просияв на Фаворе, нас просветил есть.
Возшед на гору Фаворскую, преобразился еси, Христе, и лесть всю омрачив, нас просветил еси.
Тя Бога познавше славнии апостоли, на Фаворе же, Христе, удивльшеся, колена преклониша.
Ин.
Ирмос:
Очисти мя, Спасе, многа бо беззакония моя и из глубины зол возведи, молюся, к Тебе бо возопих, и услыши мя, Боже спасения моего.
Яко велие и страшное узреся видение днесь: с небесе убо чувственное, от земли же несравненное, облиста Солнце правды мысленное на горе Фаворстей.
Прейде убо сень законная, изнемогшая, прииде же яве Христос Истина, Моисей возопи, на Фаворе видев Твое Божество.
Столп огненный, Христа преобразующася, облак же — яве благодать Духа, осенившую на Фаворе, предсказаша явленнейше.
Кондак, глас 7. Самогласен.
На горе преобразился еси, и якоже вмещаху ученицы Твои, славу Твою, Христе Боже, видеша, да егда Тя узрят распинаема, страдание убо уразумеют вольное, мiрови же проповедят, яко ты еси воистинну Отчее сияние.
Икос: Востаните, ленивии, иже всегда низу поникшии в землю души моея помыслы, возмитеся и возвыситеся на высоту Божественнаго восхождения. Притецем к Петру и к Зеведеевым и вкупе со онеми Фаворскую гору достигнем, да видим с ними славу Бога нашего, глас же услышим, егоже свыше слышаша и проповедаша Отчее сияние.
Песнь 7.
Ирмос:
Авраамстии иногда в Вавилоне отроцы пещный пламень попраша, песньми взывающе: отец наших Боже, благословен еси.
Облиставшеся Светом неприступныя славы на Фаворстей горе, апостоли Христу вопияху: отец наших Боже, благословен еси.
Сиянием Божественнаго шума, и росодательным облаком, Христе, и зарею Твоею наслаждаеми, апостоли пояху: отец наших Боже, благословен еси.
В неприступнем свете, яко виде Тя Петр, на Фаворстей горе облиставша, Христе, возопи: отец наших Боже, благословен еси.
С Начальником жизни Христом суще, дети Зеведеевы, яко испусти зрака свет, возгремеша, отец наших Боже, благословен еси.
Ин.
Ирмос:
Отроцы еврейстиии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.
Ныне видена быша апостолом невидимая Божества во плоти, на горе Фаворстей облиставша вопиющим: благословен еси, Господи Боже, во веки.
Ужасошася страхом, удивльшеся благолепию Божественнаго Царства, на горе Фаворстей апостоли, вопиюще: благословен еси, Господи Боже, во веки.
Ныне неуслышанная услышана быша: без отца бо Сын от Девы Отеческим гласом славно свидетельствуется, яко Бог и Человек Тойже во веки.
Положением не был еси Вышняго, существом же Сын возлюблен, прежде Сый, нам приближился еси непреложно: благословен еси, Господи Боже, во веки.
Песнь 8.
Ирмос:
В Вавилоне отроцы, Божственною распалаеми ревностию, мучителя и пламене прещение мужески попраша и посреде огня ввержени, орошаеми пояху: благословите, вся дела Господня, Господа.
Мановением вся носяй, ногами пречистыми на гору взыде Фаворскую Христос, на ней же паче солнечныя лучи облиста лицем, иже закону старейшия и благодати показа поющия: благословите вся дела Господня, Господа.
Неприступною славою на горе явлься неизреченно Фаворстей, неодержимый и незаходимый Свет, Отчее сияние, тварь уяснив, человеки обожи, поющия: благословите, вся дела Господня, Господа.
Священнолепно стояше Моисей же и Илия на горе Фаворе, Божественныя начертание ясно Ипостаси видевше, Христа, во Отечестей облиставша славе, воспеваху: благословите, вся дела Господня, Господа.
Иже во зраце Божественнаго ради явления лице прославися иногда Моисеово, Христос же, яко ризою, Светом и славою одевается, Света бо самодетелен Сый, озаряет поющия: благословите, вся дела Господня, Господа.
От светородна облака Христа ученицы объята сряще на Фаворе и ницы на землю падше, ум просвещше, со Отцем Сего пояху и Духом: благословите, вся дела Господня, Господа.
Ин:
Ирмос:
Седмерицею пещь халдейский мучитель Богочестивым неистовно разжже, силою же лучшею спасены сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Услышавше, Владыко, от Отца свидетельствуема ияко человеческа твердейша зрака зрети лицы Твоего блистания не терпяще, Твои ученицы на землю ниц падаху, со страхом поюще: священницы, благословите, людие, превозносите во вся веки.
Царствующим еси Царь, прекрасен и иже всюду владящим Господь силен, Блажен и во свете Живый неприступнем, Емуже ученицы удивльшеся, Моисей же и Илия вопияху: отроцы, благословите, священницы, воспойте, людие, превозносите во вся веки.
Яко Небом владущему, и землею господствующему, и над преисподними область имущему, Христе, предсташа Ти: от земли убо — апостоли, яко с Небесе же — Фесвитянин Илия, Моисей же — от мертвых, поюще согласно: людие, превозносите во вся веки.
Уныние раждающия печали на земли оставиша апостолов избрании, Человеколюбче, яко Тебе последоваша, ко иже от земли преложению Божественнаго жития. Темже и по достоянию Твоего Богоявления улучивше, пояху: людие, превозносите Его во веки.
Песнь 9.
Ирмос:
Рождество Твое нетленно явися: Бог из боку Твоею пройде, яко Плотоносец явися на земли и с человеки поживе. Тя, Богородице, тем вси величаем.
Ужасни новым светолитием внезапу ученицы освещшеся, друг друга зряху, удивльшеся же и земли преклоньшеся, Тебе, Владыце всех, поклонишася.
Шум из обласка посылашеся богогласен, извествуя чудо: Отец бо Светов — Сей есть Сын Мой возлюбленный, — апостолом вопияше: Того послушайте.
Новая видевше и преславная, глас Отеческий внушивше, на Фаворе Словесе слуги, изображение Первообразнаго, Сей есть, — вопияху, — Спас наш.
Образе непременный Сущаго, непостижиме, печать неизменна, Сыне, Слове, мудросте и мышце, деснице Вышняго, Сило, Тя воспеваем со Отцем же и Духом.
Ин.
Ирмос:
Устрашися всяк слух неизреченная Божия снизхождения, яко Вышний волею сниде даже и до плоти, от Девическаго чрева быв Человек. Темже Пречистую Богородицу, вернии, величаем.
Да Твое покажеши яве неизреченное второе снитие, яко да Вышний Бог явишися, ста посреде богов, апостол на Фаворе, Моисея и Илию неизреченно осиял еси. Темже вси Тя, Христе, величаем.
Приидите, Мне покоритеся, людие, восшедше на гору святую Пренебесную, невещественно станем во граде Живаго Бога и узрим мысленно Божество невещественное, Отца и Духа, в Сыне Единородном облистающее.
Привлекл еси любовию мя, Спасе, и пременил еси огнем Божественным Твоим желанием, но попали огнем невещественным грехи моя и насытитися Твоея пищи сподоби, да обое играя, величаю, Блаже, величия Твоя.
Светилен:
Свете неизменный Слове, Света Отца Нерожденна, в явленнем свете Твоем, днесь на Фаворе свет видехом Отца, свет и Духа, светом Наставляющаго всю тварь. [Трижды.]
На хвалитех, Всякое дыхание: поставим стихи 4, глас 4:
Подобен: Званный свыше:

Прежде честнаго Креста Твоего и страдания, поим ихже проразсудил еси, от священных ученик, на Фаворскую Владыко возшел еси гору, показати восхотев сим славу Твою, иже и видевше Тя преобразившася, и паче солнца просиявша, ницы падше, силе Твоей удивишася, взывающе: Ты Безлетен Свет еси Христе, и Сияние Отчее, аще и волею плоть явился еси, неизменне. [Дважды]
Иже прежде век Сый Бог Слово, Иже светом яко ризою одеваяйся, преобразующийся пред ученики Твоими, паче солнца Слове просиял еси: Моисей же и Илиа Тебе предсташа, мертвым и живым Тя Господа поведающе, и Твое славяще неизреченное смотрение и милость, и многое милосердие, имже Спасл еси мiр, грехом погибающий.
От Девическаго облака Тя рожденна, и плоть бывша, на горе Фаворстей преобразующася Господи, и облаком светлым Тя окружаема, глас Родителев, Возлюбленнаго Тя Сына, учеником предстоящим Тебе яве сказоваше, яко Единосущна и Единопрестольна. Темже Петр удивляяся, добро есть зде быти глаголаше, Благодетелю Многомилостиве.
Слава, и ныне, глас 8:
[Византиево:
] Поят Христос Петра, Иакова и Иоанна, на гору высоку едины, и преобразися пред ними: и просветися лице Его яко солнце, ризы же Его быша белы яко свет: и явишася Моисей и Илиа с Ним глаголюще, и облак светел осени их. И се глас из облака глаголющь: Сей есть Сын Мой Возлюбленный, о Немже благоволих, Того послушайте.
Славословие великое, и отпуст.

На литургии:
Антифон 1-й глас 2:
Стих 1, псалом 65:
Воскликните Господеви вся земля, пойте же Имени Его, дадите славу хвале Его.
Молитвами Богородицы, Спасе, спаси нас.
Паки другий лик, тойже стих: Воскликните Господеви: Молитвами Богородицы, Спасе, спаси нас.
И паки 1-й лик, стих 2-й, псалом 76: Глас грома Твоего в колеси, осветиша молния Твоя вселенную, подвижеся и трепетна бысть земля.
Молитвами Богородицы, Спасе, спаси нас.
Таже 2-й лик, стих 3, псалом 103: Во исповедание и в велелепоту облеклся еси, одеяйся светом яко ризою. Молитвами Богородицы, Спасе, спаси нас.
Слава, и ныне: Молитвами Богородицы, Спасе, спаси нас.
Антифон 2-й:
Стих 1, псалом 47:
Горы Сионския, ребра северова, град Царя Великаго.
Спаси ны, Сыне Божий, Преобразивыйся на горе, поющия Ти: аллилуиа.
Другий лик, тойже стих.
Стих 2-й, псалом 77: И введе я в гору святыни своея, гору сию, юже стяжа десница Его.
Спаси ны, Сыне Божий:
Стих 3: Гору Сионю, юже возлюби, и созда яко единорога святилище Свое.
Спаси ны, Сыне Божий:
Слава, и ныне: Единородный Сыне и Слове Божий:
Антифон 3-й, глас 7:
Стих 1-й, псалом 124
: Надеющиися на Господа, яко гора Сион, не подвижится во век.
Тропарь, глас 7: Преобразился еси на горе, Христе Боже, показавый учеником Твоим славу Твою, якоже можаху: да возсияет и нам грешным свет Твой присносущный, молитвами Богородицы. Светодавче, слава Тебе.
Стих 2: Горы окрест Его, и Господь окрест людей Своих, от ныне и до века.
Тропарь: Преобразился еси:
Стих 3, псалом 14: Господи, кто обитает в жилищи Твоем? Или кто вселится во святую гору Твою?
Тропарь: Преобразился еси:
Стих 4, псалом 23: Кто взыдет на гору Господню? Или кто станет на месте святем Его?
Тропарь: Преобразился еси:
Входное: Господи, посли свет Твой, и истину Твою, та мя настависта, и введоста мя в гору святую Твою.
Тропарь: Преобразился еси:
Слава, и ныне.
Кондак, глас тойже:

На горе преобразился еси, и, якоже вмещаху, ученицы Твои славу Твою, Христе Боже, видеша: да егда Тя узрят распинаема, страдание убо уразумеют вольное, мiрови же проповедят, яко Ты еси воистинну Отчее Сияние.
Трисвятое.
Прокимен, глас 4:
Яко возвеличишася дела Твоя, Господи, вся премудростию сотворил еси.
Стих: Благослови душе моя Господа, Господи Боже мой, возвеличился еси зело.
Апостол, Петрова послания, зачало 65.
Аллилуиа, глас 8:
Твоя суть небеса, и Твоя есть земля.
Стих: Блажени людие, ведущии воскликновение.
Евангелие Матфеа, зачало 70.
За Достойно, ирмос: Рождество Твое нетленно явися: И до отдания.
Причастен:
Господи, во свете лица Твоего пойдем, и о Имени Твоем возрадуемся во веки.

На трапезе же разрешаем на рыбу, и елей, и вино, аще среда или пяток.
ЗРИ Подобает ведати: яко предание имамы от святых отец от спасительнаго сего праздника Преображения снедати гроздие, идеже обретается, благословение приемше от иерея. Принесену бывшу гроздию в церковь и по анафоре раздроблену, глаголется же сия молитва на раздробление гроздия от святителя или от иерея:

Боже, Спасителю наш, Благоволивый Виноград нарещи Единороднаго Твоего Сына, Господа Бога и Спаса нашего Иисуса Христа, и тем плод безсмертия нам дарова, Сам и ныне плодный сей виноград благослови и нас, рабы Твоя, вкушающия от него, Истиннаго Винограда причастники сотвори, неврежденну жизнь нашу сохрани, и мир нам всегда даруй, и вечными Твоими неотъемлемыми даровании жизнь нашу украси, молитвами Пречистыя Владычицы нашея Богородицы и Приснодевы Марии и всех Твоих святых, от века Тебе благоугодивших. Яко Благ и Человеколюбец Бог еси, и Тебе славу возсылаем, Безначальному Отцу со Единородным Твоим Сыном и с Пресвятым и Благим и Животворящим Твоим Духом, ныне и присно и во веки веков. Аминь.
Молитва над всяким плодом.
Господи, Боже наш, положивый верующим в Тя пользование творении Твоими, Сам благослови предлежащия плоды сия словом Твоим, молимся Тебе, милостию и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков. Аминь.

Использование материалов сайта разрешается при наличии индексируемой ссылки на источник.

Все права на изображения и тексты принадлежат их авторам. 

"Кирово-Чепецкое благочиние", 2004-2012.